Концертот на Нокаут во Скопје на 08.Јуни.2013

Јас и професорот со неговата сопруга, фино позиционирани и расположени на една од масичките, пиеме и коментираме за вообичаени и невообичаени животни сценарија, ја оправаме државата, се потсеќаме на времиња и идентификуваме заеднички пријатели и познаници преку случки од животот.
По неколку испиени пијачки и пријатен муабет со пријатни луѓе забележувам дека клубот веќе се наполнил, а луѓето расположени почнуваат да бидат активни. Она што ми остави впечаток е дека имаше бурна реакција кога низ звучниците се слушна U Can't Touch This од MC Hammer. Ех, си велам, што добри музички времиња беа тоа. Првата половина на деведесетите години од минатиот век. Па почнувам да се потсетувам на останатите од тоа време: C&C Music Factory, De la Soul, Vanilla Ice и да не ги редам сега сите. Си велам, штом вака реагира публикава на MC Hammer тогаш доминантната публика не е толку многу млада како што јас очекував да биде. Тоа би требало да се луѓе на некоја возраст од 32/33 до 40 години.

Клубот веќе беше полн и сите очекуваа почетокот на она за што беа дојдени.

Претходниот ден и дел од ноќта Нокаут имаа исцрпувачко и долгометражно снимање на видео спотот за песната „Запомни, тоа е сè што имаме”. Уморни, но насмеани пред луѓето што дошле да ги гледаат и да ги слушаат нивните песни, се качија на бината неколку минути пред 2h по полноќ и реализираа ННН (трипл Н) отварање. (песната Нокаут, од нивниот прв албум со назив Нокаут, што ја изведе, се разбира, групата Нокаут).
Колку и да се уморни, кога ќе излезат на бина како инстант да добиваат енергија, како да добиваат дополнителни две нуркачки боци кислорот на грбот. Веројатно тоа е дел од она што се нарекува професионален однос што јас лично го препознавам, како и многу години (повеќе од 15 години постоење на Нокаут) креирање синапси за она што го прават, а тоа е создавање и изведување музика и тоа добра музика.

Беа свирени најголем дел од песните што повеќето луѓе ги знаат. Музичката еволуција на Нокаут од почетокот (Еј Би Си) до нивната последна песна (Запомни, тоа е сè што имаме) е голема. Последната песна е скоро промовирана во јавноста и верувам дека ќе треба да помине некое време за да може гласно сите да ја пеат на некој од настапите што следеат, но затоа кога почна изведбата на Еј Би Си, можеше да се осети задоволството кај публиката.

Запомни, тоа е сè што имаме

Живот дојде, друг пак заминува кој многу ми значи
Прекрасно изгледа, лице тажно ме погледна, живи здрави!
Вети ќе се слушнеме, можеби, а можеби не.

Дојде време јас да понесам
кревам знаме, високо нишанам
затворам очи, да не избледне се

Време лечи се, само вистина не
погледни ме мене
Сеуште не се познава, добро успевам
да го сокријам, длабоко, длабоко
бори се!

Дојде време да се откријам
кревам знаме, високо нишанам
затворам очи да запаметам се

Дојде време јас да понесам
кревам знаме, високо нишанам
затворам очи, да не избледне се

За мене тоа е сè што имам засекогаш,
ти си ми се!

Песната може да ја преслушате овде.
Нема оправдување да не се знае за следниот настап на Нокаут. В-)

Имав прилика да се качам на бината додека траеше свирката, за да направам неколку фотографии (да им сметам малку на професионалните фотографи В-)) и за да видам барем неколку минути како изгледа кога стоиш пред толку многу народ што го очекува од тебе најдоброто во моментот во кој се наоѓате заедно на истото место.
Моја слободна проценка е дека имаше неколку стотици љубители на музиката на Нокаут. Во првите „борбени” редови пред бината, можев да забележам задоволни лица што очигледно беа добро  „наоружани” со знаење на текстовите од песните, спремни за уживање и пееа заедно со Пере.

Публиката имаше можност да ја слушне и изведбата на последната песна. И покрај тоа што бев малку настрана од бината, мене ми звучеше одлично. (со нетрпение го очекувам и видео спотот за оваа песна)

Не сум сигурен колку долго траеше концертот. Помина брзо и лесно како што обично поминува времето кога правиш нешто што го сакаш. (Убави и пријатни луѓе, познати и пријатели, добра музика, по некоја пијачка и радост)

Откако заврши свирката следеше вербална комуникација со дел од фановите за да се сподели искуство од двете страни. Она што јас го наслушнав во дел од дискусијата, затоа што случајно се најдов до некои од членовите на бендот, е дека фановите уживале во концертот.
Членовите на Нокаут пак, се интересираа за тоа како си поминале фановите и учтиво се заблагодаруваа на убавите и пофални зборови од фановите.
Се разбира следеше и фотографирање со членови од бендот. Јас исто така како и останатите фанови на Нокаут, го искористив моментот да бидам дел од личната документација за овој настан, преку фотографија заедно со Пере и Бојан.

Фото галерија (зад камерите) од снимањето на видео спотот за песната „Запомни, тоа е сè што имаме” од Нокаут

Нокаут на снимање на видео спотот за песната:
„Запомни, тоа е се што имаме”

Во текот на вчерашниот ден, од рано наутро до доцните вечерни часови или подобро да напишам, до раните утрински часови, ама следниот ден т.е. денес, Нокаут снимаше видео спот за нивната песна „Запомни тоа е сè што имаме”.

Многу ми е драго што имав прилика да фотографирам на вчерашното снимање. За тоа овозможено задоволство им благодарам и на Нокаут и на сите учесници во создавањето на видео материјалот за спотот.

Во оваа прилика би сакал да споделам дел од мојата фото галерија од овој настан. Спотот се снимаше на неколку локации. Јас посетив само една од локациите на која се снимаа три различни сцени. (локација: црква Архангел Михаиил)

ВИДЕО ИДЕ! АКЦИЈА!

Вчерашниот ден за мене беше инспиративен. Успеав да направам скоро 900 фотографии, а неколку од фотографиите може да ги видите овде.

Со нетрпение очекувам да го видам спотот стокмен.

Денеска (Сабота 08.Јуни.2013) со почеток на полноќ, односно со почеток на новиот ден (Недела 09.Јуни.2013), ќе започне и концертот на Нокаут во Колосеум. Оваа последна (до моментот на пишување на овој текст) песна на Нокаут треба да биде изведена на концертот. Одам таму да уживам, а и да направам некоја фотографија и од овој настан.

Over & Out,

Заливот на Коските на Охридско Езеро

Прекрасно место на брегот на Охридското Езеро, веднаш до кампот „Градиште”.
Има многу ресурси за оваа локација на кои може да се прочита по нешто, а и да се видат фотографии. (фото галерија, локација и куса информација, за проектот и локалитетот)

Деталите за проектот ги има овде во форма на PDF документ. Научете малку за локалитетот и проектот, па во ситуација во која ќе имате гостин странец и ќе треба или ќе сакате да му покажете нешто специфично за охридскиот регион, може да прошетате до Музејот на Вода/ Заливот на Коските/ Наколна населба и да му ја раскажете приказната за оваа локација на наша територија.

Реконструкција на наколната населба во
Заливот на Коските од доцното
бронзено време и на почетоците од
железното време
(од 1500 до 700 година пред хрисотвата ера)

Јас би сакал да ја споделам мојата галерија фотографии направени на 05.Мај.2013 и би сакал да дадам препорака за да го посетите Заливот на Коските доколку сте во Охрид или во негова близина.
Ако барате малку мир, извонредна природа или имате желба да добиете претстава како некои далечни предци на човечкиот род живееле и се штителе од заканите на природата и други животински видови, а најверојатно и од други племиња, Музејот на Вода е местото за Вас.

Кога бев последниот пат таму (почеток на Мај 2013) си купив еден каталог со фотографии од дното што веројатно нуркачкиот тим од проектот ги имаат направено.

Следат неколку фотографии од каталогот. За да не биде ова критика на нешто што одговорните се потрудиле да го направат како рекламен материјал за локалитетот и за неговата промоција, ќе напишам што мене ми недостасува во овој каталог со фотографии. (Овој каталог ме чинеше 300 денари, а има неколку книги што може да се набават на лице место, како и неколку реконструкции на керамички предмети што се пронајдени на дното при истражувањата)

Мене ми недостасуваа барем технички податоци во пишана форма за фотографиите што тој ги содржи, за да знам што е тоа што го гледам. (Пример: Има фотографии од дното на езерото во која се гледаат трупци / колови во земјата. Мене би ми значело, а верувам и на секој оној што ќе посака да однесе дома некаков документ од овој локалитет, да има еден пасус покрај фотографијата во кој ќе пишува колку колци се претпоставува дека имала населбата, колку се пронајдени, на која длабочина се тие сега, на која длабочина биле тогаш според истражувањето и евентуално каква техника имале луѓето на нивно забивање во водена површина)

Ако во каталогот воведното четиво

е и на англиски, мислам дека е добро

и насловната да има и англиски превод

Ми се допаѓа што има и превод на

Англиски јазик

Ми недостасува информација за тоа

што го гледам. Што е тоа што го гледам

на овие две фотографии?

 Ако ова е локацијата пред да почне

реконструкцијата на локалитетот,

би сакал да видам како тој изгледа

по неговата реконструкција

Какви се овие предмети? Од кога се?

На која точно локација се најдени?

За што служеле, на која длабочина

се најдени? Од што се направени?

Ако каталогот се однесува многу

повеќе на проектот, а не на историјата

за локалитетот и тоа што е пронајдено,

тогаш како и кој прв открил за ова?

Очигледно дека ова е тимот нуркачи,

јас го препознавам само последниот

од најдолниот ред (човекот што носи

повеќе часовници - А за тоа колку е саат,
прашај го Кузман Паско © Пука Козметика)

Во ред е информација за тоа кој што

правел околу документот, но не

тоа да е пола од текстуалната

содржина. Таму каде што таа

навистина треба за да ја објасни

суштината, изостанува.

Се надевам дека текстот ќе стигне до некој што има можност да направи корекција на документот за кој пишував и дека моите забелешки ќе ги разбере добронамерно бидејќи навистина и за такви се пишувани и ќе направи негова ревизија со цел тој да биде подобар и покорисен за секој добронамерник што сака да го потсетува нешто на локацијата и кога е далеку од локалитетот.

За крај еве и две видеа снимени од нуркачи на локацијата: видео 1, видео 2

Over & Out

П.С. Еве една конкретна имплементација на граѓанскиот концепт во сегментот на музичката улична суб-култура. РЕСПЕКТ ГЕТО ВИЈАТНАМСКО!

Добро е, изостанаа погрдните навивања на национална основа

Стадионот се испразни, останаа уште белгиските навивачи кои беа замолени да почекаат 30-тина минути по завршување на натпреварот пред да го напуштат стадионот.
Резултатскиот епилог: два гола плус во корист на белгиската репрезентација, а јас бележам натпревар на кој изостанаа навредливите навивачки фрази на национална основа. Го напуштам теренот несреќен поради резултатот, но задоволен поради тоа што немав прилика да слушам навредливи навивачки пораки на национална основа. Очигледно е дека сите коментари и апели од различни страни (поединци, медиуми, фудбалери, ФФМ) стигнаа до воџите на навивачките групи кои овој пат во овој контекст имаа примарно поведение.

Исто така ми се допадна што немаше свиркање на химната од противникот, што било пракса, туку срамежливо се слушаше по некое ракоплескање по нејзиното интонирање. Тоа е добра порака што ја испраќаме на европската фудбалска јавност.

Нема да си дозволам да коментирам за тоа како помина нашата репрезентација. На таа тема би сакал да прочитам нешто од компетентни луѓе. Како обичен љубител на спортот и фудбалот би сакал да напишам дека бев задоволен од тоа што првото полувреме успеавме да играме доволно добро за да има интересен фудбал (барем според мојот критериум) и дека мојата репрезентација не изгледаше инфериорно во однос на противникот. Немавме добра реализација. Повеќе среќа следниот пат но веројатно и повеќе интензивни тренинзи за шут на гол со глава, нога и сите дозволени делови од телото.

Би сакал да споменам дека ми недостасуваше брошура како онаа што се делеше на натпреварот со Данска, за да можам да ги имам пред мене составите и дополнителните информации за секој од играчите.

Ниво 1 (Level 1) се чини го поминавме, се надевам дека нема да треба никогаш повеќе да се вратиме на него (она со навредливите скандирања на национална основа).

Сепак, следи ниво 2 (Level 2). Ако во минатото сценарио требаше да се надминат навредливите пораки кон нашите репрезентативци од албанска националност, овој пат ќе треба да ја надминеме потребата за навредливи извици кон UEFA. (Дел од навивачите скандираа: UEFA МАФИЈА!)

Од она што јас го знам, информирајќи се преку официјалните извори за информирање е дека UEFA и FIFA помогнаа да добиеме нешто што се нарекува Куќа на фудбалот. Официјалното отворање на овој комплекс се случи минатата недела. На отворањето присуствуваше и Мишел Платини (актуелен претседател на UEFA).
Не разбирам што значеше скандирањето UEFA МАФИЈА!? Ако ова се однесува на некаква идентификувана неправда врз нашиот тим случена на напреварот (можеби пеналот досуден за репрезентацијата на Белгија?) тогаш требаше да има скандирање поврзано со FIFA, затоа што FIFA беше организатор на натпреварот.
Можеби има нешто трето за кое јас незнам, а со кое UEFA нанела штета на македонскиот фудбал?
Се чини дека на навивачките групи им треба редовни сесии со некој кој ќе им помогне за да научат како да се однесуваат на стадион кога навиваат. Оваа втора итерација, или втор пример од една иста група сценарија што прават некаква логичка целина(прв пример: навреда сопствени репрезентативци на национална основа; втор пример: УЕФА МАФИЈА!), ме потсетува на следново:
Во образованието на млад човек му се неопходни повеќе практични примери за да научи за некаков принцип или да може некаков проблем да го идентификува преку апстракција што се однесува на повеќе такви, слични проблеми. Обично повозрасните имаат помал проблем (способни се) работите да ги дефинираат и толкуваат на апстрактно ниво. Па во оваа прилика за да не правиме трета, четврта и n-та итерација за една група проблеми/грешки/непријатни ситуации, би се обратил на повозрасните од навивачите:

Ајда да се обидеме да навиваме спортски и мотивирачки за нашите, наместо да „плукаме”, псуеме и кудиме било кој.

Доколку сакаш фотографии, мојата фото-галерија од натпреварот помеѓу Македонија и Белгија одигран во петокот (22.03.2013), може да ја погледнеш овде. (Фотографиите се направени со Nikon D40 и Nikon AF-S DX Nikkor 55-300mm f/4.5-5.6G ED VR)

За, од прилика, еден час од моментот на пишување на овој текст почнува реваншот помеѓу Белгија и Македонија. Еве една порака во врска со овој настан до нашите на најистурените позиции на „фронтот”: НАПРЕД НАШИ!!!

Over & Out,

P.S. Други текстови на тема: Нефкусни навивачки пораки:

• 100% Фудбал
• Да, Македонија - Данска 3:0 ама...

P.P.S. Еве една фикција што ја создадовме пред некое време со мојот син.

На што прво ви текнува кога ќе ви кажам црн бибер?

Не ми се верува дека некој нема да го препознае производот што е спакуван во амбалажата што е на сликата лево од текстов.
Многу интересна графичка илустрација на амбалажата од црниот бибер на Витаминка Прилеп. Оваа амбалажа е таква откако помнам за себе и не ми пречи, ама се прашувам зошто ли има црнче како илустрација!? В-) Демек, црнчето треба да асоцира на биберот што е црн? Се прашувам доколку во прашкасти производи имаа производ бел бибер што ќе имаше како илустрација, гринго!? В-)

Не одам понатаму во размислувањето и асоцијациите на биберот и илустрацијата на црниот бибер од Витаминка додека пишувам, а ми текнуваат некои интересни за кои некој може да ме обвини за расизам. Наместо тоа, се обидувам да побарам повеќе информации за црниот бибер, неговото потекло и значење за да направам некаква поинаква и пологична врска, наспроти моите морбидни што ги имам, за кои нема да пишувам. Јок, не иде!

Здраво татковино! Кажи ми како си!?

Over & Out,

Со Никола Стојковски за Fin Project и музиката воопшто

Одличен производ! Тоа ќе ми биде одговорот доколку ме прашаат за beats & ornaments inside Macedonia. Кога бев лани во Декември во ½ Југотон (ГТЦ) да си купам нешто од поновата македонска продукција (ова ми е како некаков ритуал наназад една година), ми го препорачаа Fin project – beats & ornaments inside Macedonia (BOIM). На услужливиот познавач на музиката од ½ Југотон му реков дека ќе го земам и Fin project. По две недели преслушување со паузи и во различни услови, можам да кажам дека музиката од BOIM навистина ми се допаѓа. После две недели го купив и му го подарив на еден мој пријател што ја сака современата електронска музика на кој исто така му се допадна.

Неодамна овој музички производ имаше своја официјална промоција. Можеше да се забележат неколку написи во различни медиуми за овој музички албум. Некои од текстовите ги прочитав, па сепак, имав желба да го прашам неколку прашања носителот на овој проект Никола Стојковски [НС]. На мое задоволство тој се согласи да ми одговори на моите прашања за да можам да си го задоволам моето љубопитство, но и за да споделам информации на темата, преку овој текст.

[ВБУ] Овој албум е тематски. Сегменти од македонската изворна музика се провлекува низ сите траки на албумот. Никола, колку изборот на изворните песни за содржината на албумот е внимателно направен?
[НС] Традиционалната музика кај нас, според мене, најчесто се поврзува со турбофолкот, барем меѓу младите, со тоа нејзината вредност е деградирана. Со цел да придонесам кон разбивање на таа предрасуда, разработив теми на еден поинаков, за нив поприфатлив начин, намерно одбирајќи некои повеќе познати но и помалку познати теми.

[ВБУ] Ми се чини дека некои музички автор во една фаза од нивното креативно изразување, ја третира изворната музика. Сум слушнал такви изрази на креативност што некако, како со токмак за рушење криви ѕидови да се набивани во некаква музичка секвенца и за кои од авион се гледа дека не им е местото таму. Во твојот запис од музичкиот креативен нагон што си го имал додека си го создавал она до кое денеска референцираме со BOIM, изгледа како целина, не нападно, не агресивно, не исилено туку слеано и природно. Што беше основниот мотив за третирање на изворната музика во твојот современиот музички израз спакуван во Beats and Ornaments Inside Macedonia?
[НС] Во дел од прашањето е и дел од одговорот. Имено, и јас имам слушнато такви обиди што можеби имаат искрена цел, но реализацијата не ги оправдала првичните замисли. Мојот обид е сублимиран во фузија на електронски, инструментален и традиционален звук, со внимателно градени аранжмани и музички изрази, кои се надевам ќе го најдат местото во музичките колекции на сите оние искрени љубители на музиката, не само на традиционалната, туку воопшто на музиката. Што се однесува до мотивот за третирање на изворната музика, едноставно, јас не познавам музичар кај нас, а и однадвор, кој има било какво искуство со нашиот изворен мелос, кој не е инспириран од него. Јас како Македонец, природно е да го чувствувам тоа малку посилно, па затоа и тоа чувство произведе ваков материјал.

www.finproject.mk

[ВБУ] Музичко ЦД со неколку сателити како вебсајт за проектот, профил на soundcloud.com со пола материјал достапен за преслушување, facebook, twitter и youtube профили. Несомнено сакаш кога си пред компјутер (сакаш да го користиш). Дали и колку користиш софтверски симулации наспроти хардверски уреди во процесот на создавање музика? Имаш ли омилена софтверска апликација во тој контекст?
[НС] Омилена немам, ги сакам сите. Во секое експериментирање, дали се работи за програмирање или свирење, едноставно уживам.

Останати музички соработници: Даниел Маневски (кавал),
Боби Серафимовски (гитара, пиано), Елена Христова и
Теа Богатинова (вокали)

[ВБУ] Обвивката (омотот) за медиумот што ја носи музичката содржина е на англиски јазик. Дали ова значи дека обраќањето со албумот примарно е кон светот, па потоа кон љубителите на електронската музика во Македонија? Дали албумот на ЦД медиум е дистрибуиран некаде надвор од Македонија?
[НС] Примарно е наменет на љубителите на музиката, без разлика од каде се. Со оглед на краткиот период од излегувањето на албумот, официјална продажба надвор од Македонија нема, но наскоро ќе биде достапен на сите поголеми онлајн(online) музички продавници за преземање(download), а има најави и интерес за продажба на ЦД изданието преку странски дистрибутери.

[ВБУ] Како ќе ја коментираш музиката од втората половина на деведесетите години од минатиот век и првите години од овој актуелниов, наспроти онаа последниве пет години?
[НС] Секоја деценија носи свој звук. Можеби сум пристрасен кон моите деведесетти години, но мислам дека масовната продукција и силата на парите влијаеше на пад на квалитетот. На нас останува да ја поправиме таа слика.

[ВБУ] Дали и како социјалниот и политички живот влијае на тебе и тоа што го правиш околу музиката?
[НС] Се трудам да не се оптоварувам со тоа, иако кај нас човек тешко може да се изолира од тие деструктивни влијанија. А неретко, тоа ми помага и да се затворам во студио и да го правам тоа што го сакам.

[ВБУ] Кои се првите тројца музички автори/бендови на кои ќе ти текне кога се прави муабет за добра музика и во какво расположение сакаш да ги слушаш?
[НС] Не е мал бројот на имиња кои имале влијание врз мојот музички вкус и израз. Се чувствувам незгодно кога морам да издвојам одреден мал број. Слушам различни музики во зависност од моментот и расположението. Од класична (classic), џез (jazz), фанк (funk), рок (pop), преку светска музика (world music), амбиентална (ambient), електроника до клупска музика за играње (club dance music). Во секој случај, прекрасна музика.

[ВБУ] Што има најголемо влијание над твојата желба за создавање музика? Како изгледа тој процес (создавање музика) кога си ти во прашање?
[НС] Имам едно мото што ме следи и го живеам. Музиката е основа на живеењето. Без неа, животот нема значење, нема радост, нема душа. Таа доаѓа од најискрените мисли и емоции. Музиката е славење на животот. Славете го животот!

[ВБУ] Кога би требало да му помогнеш на млад човек што ја сака музиката и што сака да создава електронска музика, што би му препорачал?
[НС] Да се препушти на искрените мисли и чувства и да продолжи да го слави животот. Тоа е сигурна опција за убав живот.

Некои од песните може да ги преслушате на www.soundcloud.com, а моја препорака е да си го купите примерок на ЦД за компетно доживување.

Дополнителни ресурси за BOIM и Fin project може да најдете на следниве линкови:

• [A1on.mk] Промовиран албумот FIN Project – beats & ornaments на Никола Стојковски
• [Нова Македонија] Турбофолкот изгради ѕид спрема сѐ што има традиционален призвук
• [Утрински весник] Промоција на албумот на „Фин проџект“ - „Ритми и орнаменти“
• [cOoLTuRa] Промоција на албум на Fin Project
• [Радио слободна Европа] „ФИН ПРОЕКТ“ со битови и орнаменти од Македонија
• [SkopjeInfo.mk] Промовиран албумот „FIN Project - beats & ornaments“ на Никола Стојковсски
• [МРТ] Промовиран албумот „Фин проџект-битс анд орнаментс“ на Никола Стојковсски
• [lokalno.mk] FIN Project - beats & ornaments насловот на новиот албум на Никола Стојковски
• [Скопје Id] Промоција на новиот албум на Fin Project
• [Плус Инфо] Промоција на новиот албум на Fin Project
• [Radio MK] Промоција на албум на Fin Project
• [МММ] Fin Project промовираат албум

100% Фудбал

Во четвртокот (28.Февруари.2013) Фудбалската федерација на Македонија ја промовираше кампањата именувана како 100% фудбал. Кампањата има за цел да промовира почит кон фудбалската игра но и кампања против насилството во фудбалот.

По последниот натреват на националниот состав што беше одигран против Данса, имаше многу реакции и незадоволства и од домашната јавност, но и од фудбалерите, особено од оние со албанска етничка припадност кои го изразија незадоволството од навредливиот однос што го имаат дел од навивачките групи.

Во кампањата се вклучени и неколку фудбалери што треба да го пренесат ставот за почит кон играта, и спротивставување на насилството. Еден од фудбалерите учесник во кампањата е и Остоја Стјепановиќ (најдобар фудбалер за 2012 година од домашното првенство).

Да се вклучиме сите во оваа иницијатива, ако не повеќе барем со долично однесување на натреварите што ги посетуваме.